नेपालद्वारा भुटान २-१ ले पराजित

छैठौं एएफसी फुटबल च्याम्पियनसिपको तयारीमा रहेको नेपालले आज अभ्यास खेलमा भुटानलाई एकका विरुद्ध दुई गोलले पराजित गरेको छ। कलकत्तास्थित मोहमदन स्पोर्टिङ क्लवको खेल मैदानमा भएको खेलको पहिलो हाफ गोल रहित बराबरीमा सकिएको थियो।

यसपछि उनानसाठ्ठीऔं मिनेटमा पासाङ छिरिङले पेनाल्टी मार्फत गोल गर्दा भुटानले अग्रता कायम गरेपनि सत्तरीऔं मिनेटमा अनिल गुरुङ बराबरी गोल फर्काउन सफल रहँदा खेल एक-एकको बराबरीमा पुग्यो। यसपछि खेल सकिन दश मिनेटबाँकी छदा चेतन घिमिरेको क्रसमा विजयले डि बक्स बाहिरबाट हानेको उत्कृष्ट प्रहार गोलमा परिणत हुँदा नेपाल दुई-एकको जित हात पार्न सफल रह्यो। यसअघिको अभ्यास खेलमा नेपालले मोहनबगानलाई पराजित गरेको थियो।

आज नेपालले भारतको चिराग फुटबल टिमसँग खेल खेल्ने तय भएपनि लिगको कारण समय नमिल्दा नेपालले भुटानसँग खेल खेलेको हो। अब नेपाली राष्ट्रिय फुटबल टिम बुधबार एएफसी च्याम्पियनसिपमा भाग लिन बंगलादेशको ढाका प्रस्थान गर्नेछ।