थारु समूदायद्वारा आन्दोलनको घोषणा

एक मधेश एक प्रदेशको बिरोधमा विभिन्न आठ थारु संघ संस्थाले आन्दोलनको घोषणा गरेका छन् । थारु कल्याणकारिणी सभा,थरुहट संयुक्त संघर्ष समिति,नेपाल लोकतान्त्रिक थारु संघ लगायतका संस्थाले शुक्रबार संयुक्त विज्ञप्ति निकाली फागुन २० गतेदेखि चैत्र १ गतेसम्मका लागि आन्दोलनका कार्यक्रम सार्वजनिक गरेका हुन् ।

एक प्रदेशका नाममा तराईका जनतालाई झुक्याउन खोजिएको भन्दै बहुप्रदेशका लागि आन्दोलन थालिएको थारु कल्याणकारिणी सभाले जनाएको छ । आन्दोलन अन्तर्गत संविधानसभालाई खवरदारीपत्र बुझाउने,२१ गते संविधानसभा घेराउ, २५ गते संयुक्तसभा, २९ गते मसाल जुलुस र चैत्र १ गते थरुहट तराई बन्दका कार्यक्रम तय गरिएको छ । यसअघि सम्पूर्ण तराईलाई एक प्रदेश बनाइनुपर्ने मुद्दामा मधेशी जनअधिकार फोरम र थरुहट संयुक्त संघर्ष समितिका संयोजक लक्ष्मण थारुले संयुक्त संघर्ष गर्ने जनाएका थिए ।